सुरुङ्गा नगरपालिका, मधेश प्रदेश, सप्तरीकी नगर प्रमुख गिता चौधरी अत्याधिक मतले निर्वाचित जनप्रतिनिधि हुनुहुन्छ। २०३५ साल भदौ ७ गते सुरुङ्गा नगरपालिका–८, समशेरपुरमा जन्मनु भएकी उहाँले २०४८ सालमा राजनीति यात्रा सुरु गर्नुभएको हो। निर्वाचित हुनु अघि सामाजिक अभियान्ता रहनु भएकी चौधरीले महिला अधिकार, महिला पहिचान र सामुदायिक विकासका क्षेत्रमा सक्रिय भूमिका निर्वाह गर्नुभएको छ।

ऐतिहासिक सुरुङ्गा पहाडको नामबाट नामाकरण गरिएको यस नगरपालिकामा प्राकृतिक स्रोत–साधन पर्याप्त छन्। उहाँको नेतृत्वमा सुशासनलाई पहिलो प्राथमिकतामा राख्दै, सेवाग्राहीलाई सहज सेवा उपलब्ध गराउने, स्थानीय सरकार  संचालन ऐनअनुसार योजना ल्याउने र कार्यान्वयन गर्ने, रोजगारीका अवसर सिर्जना गर्ने, विपद्‌का समयमा तत्काल समस्या समाधान गर्ने, महिलाहरूलाई खुला रुपमा समस्या साटासाट गर्न प्रोत्साहन दिने तथा फजुल खर्च कटौती गर्ने कार्यहरू प्रभावकारी रूपमा अघि बढाइएका छन्।