मधेश प्रदेशको पर्सा जिल्लामा अवस्थित ठोरी गाउँपालिका ऐतिहासिक, सांस्कृतिक तथा पर्यटकीय दृष्टिले महत्त्वपूर्ण स्थान हो, जहाँ राष्ट्रिय निकुञ्ज, मठ–मन्दिर, पार्क लगायतका गन्तव्यहरू रहेको छन्।

यही गाउँपालिकाकी उपाध्यक्ष गोकुली कुमारी रेग्मी २०७२ साल बाट राजनीतिक यात्रामा प्रवेश गर्नुभएको हो। निर्वाचित हुनु अघि सामाजिक अभियान्ताका रूपमा सक्रिय रहनु भएकी उहाँको जन्म २०३८ साल जेठ १ गते ठोरी–१, दिपकनगरमा भएको हो। उहाँका बुबा टुगंराज रेग्मी र आमा बालकुमारी रेग्मी हुनुहुन्छ।

जनप्रतिनिधि भएपछि उहाँले सामाजिक विभेद अन्त्य, महिला सशक्तिकरण, कक्षा १२ सम्म निःशुल्क शिक्षा, निःशुल्क एम्बुलेन्स सेवा सञ्चालन, घरदैलो सेवा, सूचना प्रवाहलाई विधीमैत्री बनाउने तथा डिजिटल गाउँपालिकाको निर्माणजस्ता कार्यलाई प्राथमिकतामा राख्दै निरन्तर अघि बढिरहनुभएको छ। सुशासन र जनमुखी सेवा प्रदान गर्ने उहाँको प्रतिबद्धताले ठोरी गाउँपालिकामा सकारात्मक परिवर्तनका संकेतहरू देखिएका छन्।