बागमती प्रदेशको मकवानपुर जिल्लामा अवस्थित हेटौंडा उपमहानगरपालिका त्रिभुवन राजमार्ग र महेन्द्र राजमार्गको संगमस्थलमा रहेको, देशकै सक्रिय र आकर्षक गन्तव्यहरू मध्ये एक हो। विविध जातीय संस्कृतिको सुन्दर मिश्रणले हेटौंडालाई बस्नयोग्य र विकासको लागि आदर्श शहरको रूपमा चिनाएको छ।

हेटौंडा उपमहानगरपालिकाकी  नगर प्रमुख मिना कुमारी लामाको जन्म २०३३ साल मंसिर २७ गते हेटौंडा–११ मा भएको हो। उहाँका बुबा सुक्रीबिर लामा र आमा सिता देवी लामा हुनुहुन्छ। २०५६ सालमा राजनीतिमा प्रवेश गर्नुभएकी उहाँ निर्वाचित हुनु अघि सामाजिक अभियान्ताका रूपमा सक्रिय रहनुभएको थियो।

जनप्रतिनिधि भएपछि उहाँले १० हजार लिटरसम्मको खानेपानी खपतमा महसुल अनुदान, सफा हेटौंडा अभियान, स्थानीय उत्पादनको ब्रान्डिङ र बजारीकरण, रोजगारी र अवसर सिर्जना, थप पूर्वाधार विकास, महिला सशक्तिकरणजस्ता कार्यहरूलाई प्राथमिकतामा राख्दै अघि बढाउनुभएको छ।

सुशासन, पारदर्शिता र जनमुखी नेतृत्वको आधारमा उहाँ हेटौंडा उपमहानगरपालिकालाई आधुनिक, सफा र आर्थिक रूपमा समृद्ध नगरको रूपमा विकास गर्न निरन्तर प्रतिबद्ध हुनुहुन्छ।