विना कुमारी भट्टराई लुम्बिनी प्रदेशको बर्दिया जिल्लास्थित ठाकुरबाबा नगरपालिकाको उपप्रमुख हुनुहुन्छ। उहाँको जन्म २०२८ साल मंसिर २४ गते तानसेन नगरपालिका–१४, अर्गलीमा विष्णु प्रसाद पन्थी र प्रेममाया पोखरेलको सुपुत्रीको रूपमा भएको हो। सामाजिक अभियान्ताको रूपमा लामो समय सक्रिय रहेकी उहाँले २०६५ साल बाट आफ्नो राजनीतिक यात्रा सुरु गर्नुभयो।

ठाकुरबाबा नगरपालिका २०७२ साल असोज २ गते बगनाह र नेउलापुर गाविसलाई एकीकृत गरी स्थापना भएको हो, जसमा पछि शिवपुर र ठाकुरद्वारा गाविसहरू थपिएर २०७३ साल फागुन २७ गते पूर्ण रूपमा नगरपालिका बनेको हो।

जनप्रतिनिधि बनेपछि उहाँले स्थानीय जनताले प्रत्यक्ष अनुभव गर्न सक्ने महत्वपूर्ण कामहरू गर्नुभएको छ। तीमध्ये प्रमुख कामहरूमा— निशुल्क शिक्षा कार्यक्रम सञ्चालन, सर्पदंश उपचारसहित २४ घण्टा आपत्कालीन स्वास्थ्य सेवा उपलब्ध गराउने व्यवस्था, कृषि उपजको समर्थन मूल्य तोकी बिउपूँजीको व्यवस्था गर्दै खरिद–बिक्रीको सहज प्रणाली, उर्जा मावि भवन निर्माण र विपन्नलाई सुरक्षित आवास निर्माणका लागि अनुदान, अपाङ्गता भएका व्यक्तिहरूलाई दोब्बर अनुदान प्रदान, पीडितको निशुल्क स्वास्थ्य बीमा, सहज र सरल न्यायिक सेवा तथा वन्यजन्तु छेकवार पर्खाल निर्माणजस्ता कार्यहरू उल्लेखनीय छन्।