“विष्णु कुमारी लिम्बु पूर्वकै जेठो नगरपालिका इलाम नगरपालिकाको उपप्रमुख हुनुहुन्छ। जिल्ला सहकारी संघ इलामको अध्यक्षसहित विभिन्न सामाजिक संस्थामा नेतृत्व गर्दै आउनु भएकी उहाँ नेपाल रेडक्रस सोसाइटी इलाम शाखाकी पूर्व सभापति तथा परिचित सामाजिक अभियन्ता पनि हुनुहुन्छ ।

यस्तै, इलाम नगरपालिका वडा नं. १० गोदकमा संचालित माई भगवती बृद्धाश्रमको स्थापना र इलाम नगरपालिका वडा नं. ९मा संचालित हिंसा पीडित महिला सुरक्षित आवास केन्द्रको स्थापनामा वहाँको उल्लेखनिय योगदान रहेको छ ।
जनप्रतिनिधि बने पश्चात उहाँले कानुन निर्माण र कार्यान्वयनमा सक्रियता देखाउनुभएको छ भने सहभागीमूलक, पारदर्शी र मितव्ययी सेवा प्रवाहलाई प्राथमिकता दिनुभएको छ। साथै टोल विकास तथा समूह–संगठनसँग समन्वय, सुझाव संकलन र सम्बोधनमार्फत सहकार्यलाई मजबुत बनाउनुभएको छ।

स्थानीय स्रोत साधनको सदुपयोग गर्दै उहाँले प्रत्येक वडामा सामाजिक सुरक्षा भत्ता, अपाङ्गता र ज्येष्ठ नागरिकलाई घरमै स्वास्थ्य उपचार सुविधा उपलब्ध गराउन, बाटो सहज बनाउन, सार्वजनिक सुनुवाईलाई प्रभावकारी बनाउन र शिक्षामा पहुँच तथा गुणस्तर सुधार गर्न उल्लेखनीय योगदान दिनुभएको छ।”