डोल्मा तामाङ सुदूरपश्चिम प्रदेश अन्तर्गत बझाङ जिल्लाको साइपाल गाउँपालिकाकी उपाध्यक्ष हुनुहुन्छ। उहाँको जन्म २०४४ साल कार्तिक ७ गते हुम्ला जिल्लामा भएको हो। उहाँका पिता पाल्देन तामाङ र माता कार्मा छोमु तामाङ हुनुहुन्छ। सामाजिक अभियन्ता भएर समुदायमा सक्रिय रहनु भएकी उहाँले २०६२ सालबाट राजनीतिक यात्रा सुरु गर्नुभएको हो।

साइपाल गाउँपालिका बझाङको उत्तरी भागमा अवस्थित ऐतिहासिक, प्राकृतिक र सांस्कृतिक दृष्टिले महत्वपूर्ण क्षेत्र हो। यस क्षेत्रलाई प्राचीनकालदेखि पवित्र देवभूमि मानिन्छ। पहिले “काँडा” नामले चिनिने यो स्थानलाई २०७४ साल असोज ८ गते बसेको पहिलो गाउँसभाले नजिकैको साइपाल हिमालको नामबाट “साइपाल गाउँपालिका” नामकरण गरेको हो।

उपाध्यक्ष डोल्मा तामाङको नेतृत्वमा गाउँपालिकाले सीमान्तकृत वर्गको उत्थानमा जोड, छोरी जन्माउने आमा र एकल पुरुषलाई भत्ता, ज्येष्ठ नागरिक सम्मान, युवामैत्री कार्यक्रम र सामाजिक समावेशी विकासमा प्राथमिकता दिएको छ। समाजपरिवर्तन र समान अधिकारको सुनिश्चितताका लागि उहाँ निरन्तर सक्रिय रहनु भएको छ। र उहाँको पहिलो प्राथमिकता पालिकालाई सडक संजाल संग जोड्ने रहेको छ ।