मोहनमाया ढकाल (भण्डारी) कर्णाली प्रदेशको राजधानी सुर्खेत जिल्लास्थित वीरेन्द्रनगर नगरपालिकाको नगर प्रमुख हुनुहुन्छ। उहाँको जन्म २०३६ साल फागुन २७ गते वीरेन्द्रनगरमै माधव प्रसाद ढकाल र भिमकुमारी ढकालको सुपुत्रीको रूपमा भएको हो। सामाजिक अभियान्ताको रूपमा लामो समय सक्रिय रहनुभएकी उहाँले २०६२ सालबाट आफ्नो राजनीतिक यात्रा सुरु गर्नुभयो।

कर्णाली प्रदेशको राजधानीको रूपमा रहेको वीरेन्द्रनगर नगरपालिका पहिले चौहानचौरका नामले चिनिन्थ्यो र २०२९ सालपछि यसलाई वीरेन्द्रनगर नामाकरण गरिएको हो। यो नेपालका उत्कृष्ट गुरुयोजना भएका नगरपालिकामध्ये एक मानिन्छ।

जनप्रतिनिधि बनेपछि उहाँले जनताले प्रत्यक्ष अनुभव गर्न सक्ने थुप्रै उल्लेखनीय काम गर्नुभएको छ। तीमध्ये— सहभागितामूलक योजना निर्माण प्रक्रिया, डिजिटल पालिका निर्माण, रोजगार केन्द्रको स्थापना, शिक्षा तथा स्वास्थ्य क्षेत्रमा नमूना कार्यक्रम, सफा, हरित र पूर्वाधारमैत्री पालिका निर्माण, सार्वजनिक सुनुवाइ र सामाजिक अडिट प्रणाली लागू, सडक तथा पूर्वाधार सुधार, खानेपानी तथा सरसफाइ सेवा सुधार, महिला तथा सामाजिक सुरक्षा कार्यक्रम, र जनसुनुवाइमार्फत समस्याको शीघ्र समाधान— प्रमुख छन्।