कोशी प्रदेशको सोलुखुम्बु जिल्लामा अवस्थित थुलुङ दुधकोशी गाउँपालिका धार्मिक तथा पर्यटकिय स्थल र प्राकृतिक सौन्दर्यले भरिपूर्ण क्षेत्र हो। यही गाउँपालिकाकी उपाध्यक्ष सबिता राई समाजसेवा र जनप्रतिनिधित्वमा सक्रिय व्यक्तित्व हुनुहुन्छ। वि.सं. २०३९ साल माघ ३ गते जुबु–६ मा बुबा कृष्ण बहादुर राई र आमा लखी माया राईको कोखबाट जन्मनुभएकी उहाँ निर्वाचित हुनु अघि सामाजिक अभियान्ताका रूपमा परिचित रहनुभएको थियो।

२०६२ सालदेखि सामाजिक सेवा र राजनीतिमा सक्रिय सबिता राई संघीय संरचना अनुसार २०७४ सालमा थुलुङ दुधकोशी गाउँपालिकाको प्रथम उपाध्यक्ष पदमा निर्वाचित हुनुभयो। निर्वाचित भएपश्चात उहाँले इमानदारीपूर्वक सामाजिक न्याय, जनताको आधारभूत आवश्यकता र परिवर्तनका लागि जनमुखी कार्य गर्नुभयो।

पुनः २०७९ सालमा निर्वाचनमार्फत उपाध्यक्षको जिम्मेवारी सम्हाल्नुभएपछि उहाँ महिला सशक्तिकरण, रोजगारी, पारदर्शिता र सुशासनलाई प्राथमिकतामा राख्दै “समृद्ध र सम्मुन्त थुलुङ दुधकोशी गाउँपालिका” निर्माणमा निरन्तर योगदान गरिरहनुभएको छ।